(१) मन्त्रालयले कुनै उपभोग्य वस्तुको मूल्य निर्धारण सम्बन्धी नीति निर्माण गर्दा त्यस्तो उपभोग्य वस्तुको उत्पादन लागत, ढुवानी खर्च,  आयातकर्ताले प्रचलित कानुन बमोजिम बुझाएको कर, दस्तूर र उपभोग्य वस्तु बिक्री गर्दा बिक्रेताले लिन पाउने मुनाफा रकम समेतलाई   आधार मानी उपभोग्य वस्तुको मूल्य निर्धारण सम्बन्धी नीति निर्माण गर्नेछ । यसरी मन्त्रालयले उपभोग्य वस्तुको मूल्य निर्धारण सम्बन्धी नीति निर्माण गर्दा नेपाल उद्योग वाणिज्य महासंघ र नेपाल चेम्बर अफ कमर्शको परामर्श लिन सक्नेछ ।

(२) मन्त्रालयले कुनै सेवाको मूल्य निर्धारण सम्बन्धी नीति निर्माण गर्दा त्यस्तो सेवा प्रदान गर्ने व्यक्तिको हक हित संरक्षण र आचरण तथा काम कारबाही व्यवस्थित गर्ने सम्बन्धमा प्रचलित कानुन बमोजिम मान्यता प्राप्त कुनै निकाय वा अधिकारी भए त्यस्ता निकाय वा अधिकारीको परामर्श लिई र त्यस्ता निकाय वा अधिकारी नभए, निजले प्रदान गरेको सेवाको औचित्यतालाई दृष्टिगत गरी सेवाको मूल्य निर्धारण सम्बन्धी नीति निर्माण गर्नेछ ।

(३) उपनियम (२) बमोजिम मन्त्रालयले मूल्य निर्धारण सम्बन्धी नीति निर्माण गर्दा त्यस्तो सेवा प्रदान गरे बापत लिन पाउने मूल्य भौगोलिक क्षेत्र तथा ठाउँ विशेषको आधारमा फरक हुने गरी निर्माण गर्न सक्नेछ ।